Хрватскиот фудбалер Лука Модриќ, според пишувањата на италијанските медиуми, планира да ја заврши професионалната кариера по Светското првенство во 2026 година.
Во последните денови се појавија информации дека искусниот играч од средниот ред, кој во септември ќе наполни 41 година, нема да потпише нов договор со Милан и по крајот на сезоната ќе го напушти италијанскиот клуб.
Модриќ минатото лето пристигна во Милан, а во изминатата сезона одигра 37 натпревари, постигна два гола и забележа три асистенции.
Во текот на својата богата кариера настапуваше за Динамо Загреб, Интер Запрешиќ, Зрињски Мостар, Тотенхем и Реал Мадрид, каде што ги оствари најголемите успеси на клупски план.
