Диво приклучена пумпа вбризгувала вода од Вардар во водоводот во Гостивар: забранета употреба на водата за пиење

Агенцијата за храна и ветеринарство (АХВ) издаде времена забрана за употреба на водата за пиење од гостиварскиот водоводен систем поради основано сомнение дека е загадена и небезбедна за употреба.

— реклама —

Од АХВ информираат дека мерката е донесена по вонреден инспекциски надзор спроведен во пречистителната станица за вода во селото Вруток, по известување од Основното јавно обвинителство Гостивар, поплаки од граѓани и пријава од Министерството за внатрешни работи во врска со квалитетот и безбедноста на водата.

— реклама —

Во надзорот, покрај инспекциските служби на АХВ, учествувале и претставници на Министерството за животна средина, Основното јавно обвинителство Гостивар, крим-техника при МВР Гостивар и стручни лица од Институтот за јавно здравје.

— реклама —

При контролата било утврдено дека во главниот цевковод на водоводната мрежа нелегално била поставена пумпа која директно вбризгувала вода од реката Вардар во водоснабдителниот систем.

Од водата се земени мостри за лабораториски анализи, а забраната за нејзина употреба ќе остане во сила сè до добивањето на резултатите со кои ќе се потврди дека таа е безбедна за пиење.