СДСМ преку соопштение реагира на новото поскапување на горивата, откако дизелот од 25 август достигна цена од 101,50 денари за литар.
Од партијата велат дека станува збор за четврто поскапување во период од еден месец и обвинуваат дека зголемувањето на цената на дизелот ќе се одрази и врз транспортот, производството и дистрибуцијата, а со тоа и врз цените на храната и останатите производи.
„Секоја најавена мерка на Мицкоски за намалување на цените завршува со ново поскапување. Дизелот надмина 100 денари за литар. Ова е четврто поскапување за еден месец, што ќе повлече и нови поскапувања на храната, транспортот и услугите“, велат од СДСМ.
Од опозициската партија оценуваат дека поскапувањето не е проблем само за возачите, туку дополнителен удар врз семејните буџети, бидејќи повисоките трошоци за гориво влијаат врз целиот синџир на производство и снабдување.
СДСМ ја обвинува Владата дека нема соодветни мерки за заштита на животниот стандард и дека граѓаните, како што велат, ја плаќаат цената на нејзините политики.
