ДНК, изотопски и хемиски анализи ќе утврдуваат дали останките се на цар Самуил

Детални генетски, хемиски и изотопски анализи ќе бидат направени на посмртните останки што му се припишуваат на цар Самуил и на други членови на неговото семејство. Бугарски научници денеска ја претставија истражувачката програма, која предвидува и дигитална реконструкција на главата на Самуил.

Научниците предупредија дека за целосно завршување на сите анализи ќе бидат потребни две до три години, дури и доколку истражувањето се одвива со најбрзо темпо.

— реклама —

Прес-конференцијата се одржа пет дена откако Грција официјално ѝ ги предаде на Бугарија останките, по повеќедецениски преговори меѓу двете земји.

Досегашните антрополошки анализи покажуваат дека скелетот што традиционално му се припишува на цар Самуил му припаѓал на маж на возраст од 60 до 70 години, висок околу 173 сантиметри. На коските се забележани дегенеративни промени на ’рбетот и зглобовите, меѓу кои спондилоза и артроза.

— реклама —

Забележани се и траги од сериозна повреда на левата подлактица, која довела до создавање таканаречен лажен зглоб и значително нарушување на функцијата на раката.

Сепак, идентитетот на останките сè уште не е научно потврден, поради што истражувачите ќе применат современи методи за дополнителна проверка.

Еден од клучните делови од истражувањето ќе биде анализата на древната ДНК. Ќе се испитуваат генетскиот пол, митохондриската ДНК и Y-хромозомот, што би можело да даде податоци за биолошките роднински врски по мајчина и татковска линија.

— реклама —

Планирано е и радиојаглеродно датирање со јаглерод-14 на останките од саркофазите Алфа и Бета, како и од ѕиданиот гроб Делта.

Дел од примероците веќе се испратени во специјализирани лаборатории во Мајнц и Бон во Германија. Научниците, сепак, предупредуваат дека поради староста и состојбата на коските не е извесно дали од сите примероци ќе може да се добијат употребливи генетски податоци.

Останките што му се припишуваат на цар Самуил биле откриени во 1969 година од грчкиот археолог Николаос Муцопулос при истражувањата на базиликата „Свети Ахил“ на островот во Малото Преспанско Езеро.

Досегашното поврзување на останките со Самуил се темелело на археолошкиот контекст и историските толкувања. Новите анализи треба да покажат дали оваа идентификација може дополнително да биде потврдена со современи научни методи.