Саркофагот во кој треба да бидат положени останките за кои се смета дека му припаѓаат на цар Самоил се изработува во Велинград, Бугарија, од бел мермер од Македонија, односно од прилепскиот регион, објави бугарската телевизија БНТ.
Според БНТ, изработката на саркофагот се одвива деноноќно. На неговиот капак ќе има крст и натпис со кој Самоил е означен како „цар на Бугарите“.
На саркофагот ќе бидат прикажани и повеќе симболи поврзани со времето на Самоил, меѓу кои две симетрично поставени грабливи птици, црквата „Свети Ахил“ во Преспа, пауни, Архангел Михаил и приказ на Самоиловата тврдина во Охрид.
Археологот проф. Људмил Вагалински за БНТ изјавил дека мотивот со двете грабливи птици најверојатно претставува родов симбол.
Бугарските медиуми наведуваат дека саркофагот се изработува во рамките на подготовките за пренесување на останките за кои се смета дека му припаѓаат на цар Самоил од Грција во Бугарија.
