Грција ѝ ги предаде на Бугарија посмртните останки за кои се тврди дека му припаѓаат на цар Самоил

Посмртните останки на цар Самоил пристигнаа во Бугарија и со високи почести беа положени во базиликата „Света Софија“ во Софија, во присуство на актуелниот државен врв, како и поранешни премиери и претседатели.

Бугарската влада го поздрави враќањето на останките по повеќедецениски преговори. Претседателот на Бугарија, Румен Радев, порача дека договорот има историско значење за двете земји.

„Ако во минатото цар Самуил нè разделуваше, сега нè обединува. Ја прави нашата стратешка соработка уште посилна, а историските односи меѓу нашите држави и народи уште посилни“, изјави Радев.

— реклама —

Во рамките на договорот, во Грција се враќаат 48 предмети, кои грчкиот премиер Кирјакос Мицотакис ги опиша како предмети од непроценлива вредност. Станува збор за реликвии од два грчки манастири и една црква, кои повеќе од 100 години биле изложени во Националниот историски музеј во Софија.

Мицотакис порача дека враќањето на реликвиите претставува повеќе од обична културна размена.

„Ги поставуваме основите на нешто подлабоко од една едноставна културна размена, бидејќи враќањето на важните реликвии од колективното сеќавање на Грција и Бугарија ги претвора тешките моменти од минатото во мост на заедничка иднина“, рече грчкиот премиер.

— реклама —

И покрај свеченоста во Софија, дел од бугарските историчари изразуваат сомнеж околу тоа дали посмртните останки навистина му припаѓаат на цар Самоил. Тие посочуваат дека досега не била направена современа ДНК-анализа со која би се потврдила нивната автентичност.

Бугарскиот историчар Милко Палангурски вели дека со враќањето се отвориле дополнителни прашања.

„Не беше направена ДНК-анализа на посмртните останки што ќе бидат вратени во Бугарија, за да се потврди дали тие се или не се на цар Самуил“, изјави Палангурски.

— реклама —

Според него, познато е дека на островот Свети Ахил се погребани цар Самоил и неговото семејство, но, како што наведува, нема доволно истражувања со кои би се потврдила автентичноста на останките.

Настанот се следи и во Македонија. Премиерот Христијан Мицкоски, коментирајќи го враќањето на моштите, потсети на Бледскиот договор и на враќањето на моштите на Гоце Делчев во Скопје.

„Моштите на тој великан, којшто бил пред времето, симболизираат многу за македонскиот идентитет. Штета што малкумина денеска го споменуваат Бледскиот договор и сето она што таму е договорено“, изјави Мицкоски.

— реклама —

Дел од експертите сметаат дека Софија и Атина пропуштиле можност со овој процес да испратат порака за добрососедство кон Македонија.

Александар Кржаловски оцени дека природното место за посмртните останки на цар Самоил е во Преспа или Охрид и дека со актуелниот договор е пропуштена можност за поинаков пристап.

Од друга страна, македонски историчари претходно предупредуваа дека прашањето може да се користи за пропагандни цели и оти евентуалното докажување дека останките не му припаѓаат на цар Самоил би можело да отвори дополнителни прашања во иднина.