Учениците од општинските основни училишта во Центар можат да добијат месечни стипендии до 5.000 денари, во зависност од категоријата за која аплицираат. Општината објави повик за ученички стипендии во областите култура, наука, техника и посебни вештини, како и спорт.
Во категориите култура, наука, техника и посебни вештини, месечните стипендии изнесуваат 4.000 и 4.500 денари, додека спортските стипендии се во висина од 3.500, 4.500 и 5.000 денари. Стипендиите ќе се исплаќаат осум месеци во текот на тековната учебна година.
Дополнително, Општина Центар ќе додели стипендии на осум талентирани ученици кои потекнуваат од семејства со висок социјален ризик.
„Го исполнивме предизборното ветување за зголемување на ученичките стипендии за 50 проценти. Со оваа мерка обезбедуваме поголема поддршка за знаењето, креативноста, талентот и спортскиот дух на нашите ученици. Тие се нашата иднина и заслужуваат услови во кои ќе можат да се развиваат и да ги остваруваат своите амбиции“, изјави градоначалникот на Општина Центар, Горан Герасимовски.
Од Општина Центар информираат дека секој ученик може да аплицира само во една категорија. Пријавата треба да содржи потврда од училиштето дека ученикот е редовен, кратка биографија, контакт од родител или старател, како и фотокопии од свидетелства, дипломи, признанија и награди.
Во зависност од категоријата, потребно е да се достават и соодветни потврди од надлежни федерации или акредитирани организации.
Документите се поднесуваат во Архивата на Општина Центар - Скопје или по пошта на адреса „Михаил Цоков“ бр. 1, Скопје, со соодветна назнака за категоријата.
Крајниот рок за поднесување на документите е 23 септември 2026 година. Огласите со условите и потребната документација се објавени на веб-страницата на Општина Центар.
