Жителите на Општина Аеродром сѐ погласно реагираат на, како што велат, лошото одржување на јавните површини, расфрланото ѓубре и негрижата за зеленилото. Во исто време, според нив и објавените фотографии, градоначалникот присуствувал на отворање на познат бутик во трговскиот центар „Капитол“.
На социјалните мрежи изминатите денови се појавија бројни фотографии и поплаки од граѓани кои укажуваат на проблеми низ повеќе населби во општината.
„Јане Сандански 86, 10 пати пријавено, ниту еднаш исчистено“, напиша жителка на Аеродром, објавувајќи фотографија од куп кабаст отпад оставен покрај контејнери.
Друг жител реагира поради исушените тревници и новозасадените дрвца кои, според него, не добиваат соодветна грижа.
„Општина Аеродром, летото уште не е почнато, а тревата и младите дрвца веќе се исушени. На оваа локација неодамна беа засадени нови садници, но очигледно никој не ги наводнува редовно. Во вакви температури, без вода, поголемиот дел од нив нема да го преживеат летото. Ако веќе се вложени време, труд и пари за пошумување и раззеленување, да не дозволиме садниците да се исушат по неколку месеци“, наведува тој во својата објава.
Слична реакција доаѓа и од друг жител кој објави фотографии од пожолтен тревник и исушени дрвја.
„Аеродромската Сахара. И оваа година, како и секоја претходна, овој мал дел што не е бетониран го оставивте да се исуши без трунка совест. Дрвата се повеќе од пола исушени, а другата половина едвај преживува“, напиша тој.
Граѓаните алармираат и за проблеми со безбедноста поради дрвја кои не се одржуваат навреме. Еден жител објави фотографија од паднато дрво на улицата „Комаров“ број 25.
„Падна дрво на Комаров 25. Четврто за седум месеци. Кога падна третото, им рековме на службите да го средат и ова дрво. Но умните и зафатени стручни лица нѐ игнорираа. Градоначалник, општина не е улица, не е маало. Општина е заедница од секакви случувања и работи. Дајте нешто сработете редовно и за сите. Ова е четврти пат на ваша неажурност“, реагира жителот.
Утрово пак, на страницата на Општина Аеродром е објавено дека почнала работна акција.
