Независимото и кредибилно правосудство е предуслов за ефикасна борба против криминалот, оценува Мирјана Најчевска, која предупредува дека без институции ослободени од политички влијанија, секоја власт може да ги штити сопствените интереси наместо интересите на граѓаните.
Според неа, проблемот не е само во политичките структури, туку и во коруптивните практики што се создаваат во општеството и овозможуваат таквиот систем да опстојува.
Најчевска посочува дека особено загрижува кога блиски лица на политички структури, преку партиски врски и влијанија, напредуваат во образованието, во Академијата за судии и обвинители или на државни функции, иако, како што тврди, не ги исполнуваат потребните критериуми.
Таа оценува дека токму ваквите практики создаваат затворен круг во кој политичката моќ, корупцијата и институциите се меѓусебно поврзани.
„Корумпираните граѓани го овозможуваат опстојувањето на криминалните властодржци“, наведува Најчевска.
Според неа, додека јавниот обвинителски систем и судовите не се изградат како вистински независни институции со јавен кредибилитет, граѓаните ќе останат недоволно заштитени, а оние кои ја злоупотребуваат власта ќе имаат простор да избегнат одговорност.
Најчевска заклучува дека прекинувањето на „затворениот круг на корупцијата“ е неопходно за правото да може вистински да се применува.
