Професорката Мирјана Најчевска жестоко реагираше по затворањето на предметот поврзан со модуларните болници, оценувајќи дека најшокантен за неа е делот според кој не била утврдена штета врз државниот буџет.
„Најморбиден дел од пресудата ми е дека не бил оштетен државниот буџет“, напиша Најчевска.
Таа потсетува на трагедијата во модуларната болница во Тетово, каде во пожарот загинаа 14 лица, и остро ја критикува реакцијата на институциите и отсуството на поширок јавен притисок.
„Тоа дека живи изгореле 14 луѓе, од кои 10 немоќни болни, што го прави убиството квалификувано, не е важно. И граѓаните молчат. Немам зборови“, пишува Најчевска. Станува збор за нејзина правна и политичка оценка на случајот.
Професорката смета дека ваков исход треба да предизвика многу посилна општествена реакција.
„За ова се дига револуција. За ова се тресе државата. За ова се тресат политичари“, наведува таа.
Во продолжение, Најчевска ги споменува поранешниот министер за здравство Венко Филипче и поранешниот вицепремиер Кочо Анѓушев, а трагедијата со модуларната болница ја поврзува и со подоцнежниот пожар во Кочани, тврдејќи дека станува збор за последици од системска неодговорност.
Таа го критикува и премиерот Христијан Мицкоски, обвинувајќи го дека јавно зборува за неправди, а истовремено лица поврзани со случајот во Кочани ги ангажира како советници. И ова е политичко тврдење на Најчевска.
Во својата реакција таа ги споменува и претходните трагедии „Дурмо турс“, Стајковци и Гостивар, предупредувајќи дека јавноста брзо заборава на случаите во кои, според неа, можело да има превенција и одговорност.
„Не бре луѓе, со седење дома и молчење не се менуваат работите. И посебно без солидарност на сите граѓани во секоја ваква трагедија која можела да биде спречена“, пишува Најчевска.
Таа ја завршува објавата со критика на јавните приоритети, оценувајќи дека граѓаните полесно се мобилизираат околу етнички и верски прашања отколку околу трагедии во кои има човечки жртви и можни институционални пропусти.
