СДСМ преку соопштение обвинуваат дека додека премиерот Христијан Мицкоски патува со државниот авион, граѓаните со часови чекаат во долги колони на граничните премини кон Грција.
Според партијата, покрај метежот на граничниот премин „Богородица“, долги колони се формирале и кај преминот „Дојран“, каде, како што тврдат, возилата биле наредени сè до месноста „Св. Илија“.
Од СДСМ оценуваат дека ваквата состојба е резултат на политиките што ги води Владата, обвинувајќи ја за изолација на државата и создавање проблеми за граѓаните.
Во соопштението партијата тврди дека дел од владините функционери и членовите на нивните семејства поседуваат бугарски пасоши, имаат компании во Бугарија и користат европски патни исправи, додека, според нив, граѓаните се принудени да чекаат со часови на високите температури.
„Додека тие патуваат без пречки, граѓаните остануваат во долги колони на граничните премини“, наведуваат од СДСМ.
