Додик: Би било корисно за Европа јас и Вучиќ да бидеме премиери на две влади на српскиот народ

Лидерот на СНСД, Милорад Додик, смета дека би било корисно за српскиот народ, регионот и Европа доколку тој и Александар Вучиќ застанат на чело на владите на Република Српска и Србија. Во интервју за српскиот неделник „Компас“, Додик отворено го поддржа Вучиќ пред изборите во Србија, закажани за 25 октомври, и порача дека двајцата имаат заеднички поглед на политичката иднина на српскиот народ.

„Би било интересно, а мислам и корисно, не само за српскиот народ и регионот, туку и за Европа, Александар Вучиќ и јас, по изборниот триумф, да станеме претседатели на две влади на српскиот народ“, изјави Додик.

— реклама —

Говорејќи за изборните резултати во Република Српска, тој оцени дека победата на СНСД и коалициските партнери, кои според него се блиску до двотретинско мнозинство во Народното собрание, претставува потврда на политиката што ја води.

„Ова не е победа на една партија. Ова е победа на српската самосвест, српското единство и вербата на српскиот народ во себе“, рече Додик.

Тој остро ги критикуваше високите меѓународни претставници во Босна и Херцеговина, особено Кристијан Шмит, обвинувајќи ги за политичко мешање и за нарушување на надлежностите на Република Српска. За судските постапки против него тврдеше дека биле политички мотивирани, а изборните резултати ги претстави како потврда на поддршката што ја ужива.

— реклама —

Осврнувајќи се на иднината на Босна и Херцеговина, Додик оцени дека земјата е институционално нефункционална и дека нејзиниот опстанок зависи од почитувањето на Дејтонскиот мировен договор. Тој повтори дека нема да прифати централизација на државата на штета на надлежностите на Република Српска.

„За нас Дејтонскиот договор е единствената рамка на која се согласуваме. Ние нема да живееме во Босна и Херцеговина каква што тие сакаат“, изјави Додик.

— реклама —

Во интервјуто зборуваше и за односите со Вучиќ, нагласувајќи дека нивната политичка соработка е заснована на заеднички стратешки интереси. Особено ја истакна поддршката што, според него, ја добил од српскиот претседател во периодот на најсилните политички и правни притисоци.

Додик ги критикуваше и институциите на Европската Унија, оценувајќи дека европската бирократија води политики што им нанесуваат штета на европските граѓани. Тој порача дека Република Српска не е против европската интеграција, но дека нема да прифати пренесување на своите надлежности заради членство во Унијата.

„Нема дезинтеграција поради интеграција. Никогаш повеќе ЕУ нема да биде користена за да ѝ се одземе ниту една надлежност на Република Српска“, нагласи тој.

Додик изрази уверување дека Вучиќ ќе добие силна поддршка на претстојните избори во Србија. Тој истакна дека, доколку биде потребно, би учествувал и во подготовката на книгата што Вучиќ ја најавил за, како што ја нарекува, победата над „обоената револуција“.

„Дојде време на силни лидери, одлучни луѓе со став и храброст“, порача Додик, оценувајќи дека политичките промени во Европа и светот создаваат нови можности за Србија и Република Српска.