Додик тврди дека на српскиот премиер му бил забранет прелет над БиХ: „Ја преминаа секоја мера“

Поранешниот претседател на Република Српска, Милорад Додик, тврди дека на премиерот на Србија, Ѓуро Мацут, му бил забранет прелет над Босна и Херцеговина, обвинувајќи ги бошњачките политичари дека стојат зад одлуката.

Додик остро реагираше на социјалната мрежа „Икс“, оценувајќи дека со ваквата одлука е „премината секоја мера“.

— реклама —

„На политичкото лудило и изливите на омраза на бошњачките политичари мора да им дојде крај. Со одлуката еднострано да му забранат прелет на претседателот на Владата на Србија, Ѓуро Мацут, ја преминаа секоја мера“, напиша Додик.

Тој тврди дека таквата одлука е неуставна и дека институциите кои ја донеле немале право на тоа.

— реклама —

„На таква одлука немаат право. Таа не е уставна. Таа не ја почитува конститутивноста на народите – Србите, Хрватите и Бошњаците. Таа исклучува еден народ“, порача Додик.

Во продолжение тој повторно ја оспори функционалноста на Босна и Херцеговина, оценувајќи дека ваквите постапки ги потврдуваат неговите претходни ставови.

„И кога велам дека БиХ е невозможна земја, веднаш се трудат тоа да го потврдат. Ако Република Српска одбележува празник заедно со Србија, што го засега тоа Сараево“, напиша Додик.

— реклама —

Тој упати и провокативна порака кон бошњачките политичари, споменувајќи го Иран, а потоа најави дека одбележувањето во Бања Лука сепак ќе се одржи.

„Вечерва, и покрај хистеријата од Сараево, ќе го одбележиме Денот на српското единство, слободата и националното знаме, гордо и достоинствено. Функционерите на Србија ќе бидат со нас во Бања Лука, а срамот ќе остане во Сараево“, порача Додик.

Од Владата на Србија претходно беше најавено дека Мацут денеска во Бања Лука треба да се сретне со премиерот на Република Српска, Саво Миниќ, а на средбата да присуствуваат и членови на двете влади.

Мацут требаше да се обрати и на церемонијата по повод Денот на српското единство, слободата и националното знаме. Празникот е востановен во 2020 година и се одбележува на датумот поврзан со пробивот на Солунскиот фронт во Првата светска војна.