Додик: Порано не бев националист, но сега сум

Милорад Додик повторно застана во одбрана на осудените за воени злосторства во Босна и Херцеговина, тврдејќи дека тие биле неправедно казнети. Тој го изјави ова на собирот на Пале, организиран по повод 35-годишнината од основањето на таканареченото Собрание на српскиот народ во БиХ.

— реклама —

Додик оцени дека ова собрание ги поставило темелите на денешниот ентитет Република Српска, а посебно ги истакна Радован Караџиќ, Момчило Краишник и Ратко Младиќ, осудени за тешки воени злосторства, вклучително и геноцид.

— реклама —

„За жал, многумина се неправедно затворени. Никогаш не смееме да се откажеме од великаните на нашата национална и историска борба – Караџиќ, Краишник и генералот Младиќ“, рече Додик, по што присутните го поздравија со аплауз. На собирот присуствуваа и српскиот министер за одбрана, Братислав Гашиќ, како и амбасадорите на Србија и Русија во БиХ.

Додик порача дека Република Српска „сигурно не е геноцидна“, а истовремено оцени дека во денешна Босна и Херцеговина, како и во 1991 година, не е можен договор со Бошњаците, кои ги нарече муслимани. Тој изјави дека Србите немаат ништо заедничко со нив и повторно предупреди на, како што рече, опасноста од исламизација на Европа.

— реклама —

„Јас сум националист, веднаш да ви кажам. Не бев таков, сега сум“, изјави Додик. Тој додаде дека Србите денес се „единствени и интегрирани“, заблагодарувајќи му се за тоа на поранешниот претседател на Србија, Александар Вучиќ.