Додик: Во Босна и Херцеговина христијаните се под притисок од муслиманите

Во пресрет на расправата во Хрватскиот сабор за резолуцијата за зајакнување на политичката положба на Хрватите во Босна и Херцеговина, претседателот на Република Српска, Милорад Додик, изјави дека ќе ја поддржи секоја иницијатива што ќе придонесе за решавање на ова прашање, вклучително и воспоставувањето на хрватска изборна единица.

По средбата со лидерот на ХДЗ БиХ, Драган Човиќ, во Мостар, Додик рече дека такво решение е неопходно за да се зачува политичката застапеност на Хрватите во БиХ.

— реклама —

„Ќе ја поддржиме секоја иницијатива што е во интерес на хрватскиот конститутивен народ. Единствено исправно решение е хрватска изборна единица, за на вистински начин да се зачува политичката видливост на Хрватите“, изјави Додик.

Тој оцени дека конститутивноста на хрватскиот и на српскиот народ е нарушена и додаде дека христијаните во БиХ, според него, се под притисок од муслиманите.

— реклама —

Прашањето за изборот на хрватскиот член на Претседателството на БиХ повторно е во фокусот бидејќи, според хрватските политички претставници, досега четири пати оваа функција ја освоил Жељко Комшиќ со претежно гласови од бошњачките избирачи. На претстојните избори, неговата партија за кандидат го предложи неговиот советник Славен Ковачевиќ.

— реклама —

Драган Човиќ повтори дека се неопходни измени на изборниот закон за да се спречи, како што рече, прегласувањето на Хрватите при изборот на членот на Претседателството и на делегатите во Домот на народите.

„Нам ни е потребна целосна уставна еднаквост на хрватскиот народ во БиХ, како и легитимно претставување во Претседателството и во домовите на народите“, изјави Човиќ.

Додик се осврна и на најавената седница на Советот за спроведување на мирот (ПИК), на која треба да се разговара за наследникот на високиот претставник Кристијан Шмит. Тој оцени дека ПИК нема основа во Дејтонскиот мировен договор и дека со години придонесува за политичките проблеми во БиХ.

Во меѓувреме, функцијата вршител на должноста висок претставник ја презеде американскиот дипломат Луис Кришок, кој досега беше заменик на меѓународниот претставник.