„Договорот е договор“: ЕУ не попушта пред заканите на Трамп за царини на европските автомобили

Европската унија нема намера да отстапи пред најавите на американскиот претседател Доналд Трамп за воведување повисоки царини за автомобили произведени во ЕУ. Претседателката на Европската комисија, Урсула фон дер Лајен, порача дека Вашингтон треба да се држи до постигнатиот трговски договор со Брисел и нагласи дека „договорот е договор“.

— реклама —

Фон дер Лајен ја даде изјавата на прес-конференција во Ереван, на маргините на самитот ЕУ–Ерменија, откако Трамп претходно најави можност за царини од 25% за европските автомобили. Таа подвлече дека суштината на постигнатите договори се заедничките правила, доверливоста и просперитетот и додаде дека Европската унија е подготвена за „секое сценарио“.

— реклама —

Тонот од Брисел дополнително го заостри и претседателот на Европскиот совет, Антонио Кошта, кој изјави дека лидерите на ЕУ целосно го поддржуваат одговорот на Европската комисија на најновата трговска закана од Вашингтон.

— реклама —

Поддршка за цврст став на ЕУ изрази и францускиот претседател Емануел Макрон, кој во Ереван оцени дека потпишаните договори мора да се почитуваат и предупреди дека нивното доведување во прашање би значело повторно отворање на целата рамка на односите. Според Макрон, доколку се продолжи со закани за нови царини, ЕУ има механизми за одговор и треба да ги употреби, токму затоа што постојат.

По најавата од американска страна, Европската комисија, според информациите од настанот, првично избегнувала директна конфронтација, но јасно сигнализирала дека сите опции остануваат на маса. Трговските тензии меѓу ЕУ и САД повторно се враќаат во фокус, а наредните денови се очекуваат дополнителни дипломатски контакти и проценки за можните економски последици, особено за автомобилскиот сектор.