Колку чинат прославите по повод 35-годишнината од независноста на Македонија сè уште не е познато, а одговорноста за информацијата за потрошените средства меѓусебно ја префрлаат Државна лотарија и Владата.
„Сите прашања за сумата за прославите за 35 години од независноста поставете ги во Владата“, изјави за БИРН директорот на Државна лотарија Александар Климовски, институцијата која го распишала јавниот повик за реализација на настаните.
Портпаролката на Владата Марија Митева, пак, побара прашањата да ѝ бидат доставени, но одговори на нив досега нема.
Јавно достапните документи покажуваат дека Владата на 28 април годинава одлучила организацијата на прославата да му ја довери на Државна лотарија. Само два дена подоцна, на 30 април, Лотарија објавила јавен повик за прибирање понуди за реализација на спонзорирани настани по повод 35 години од самостојноста и независноста.
Според Климовски, повикот бил објавен согласно Законот за спонзорство и донации, поради што не бил објавен во системот за јавни набавки. Огласот бил објавен на интернет-страницата на Лотарија и во дневен весник, со рок од само пет работни дена за доставување понуди.
Во повикот биле наведени конкретни барања за настаните кои подоцна биле реализирани. Меѓу нив било ангажирање светски артист од „А класа“ со соодветна продукција и концерт на отворено со најмалку 30.000 посетители. Описот одговара на настапот на светски познатиот диџеј Давид Гета.
Било предвидено и учество на „интернационална светска ѕвезда од А класа“, во придружба на македонски изведувачи, што се реализираше преку настапот на оперскиот пејач Хозе Карерас.
Повикот предвидувал и најмалку 12 настани низ државата во форма на театарски и визуелни перформанси со концептот „35 години независна Македонија“. Овој опис се совпаѓа со серијата настани „Силно светнал ден“.
На повикот, според Климовски, се пријавила само компанијата „Стардаст“, преку која понуда доставил Авалон. За тоа дали понудениот концепт ги исполнувал условите од повикот одлучувала надворешна комисија составена од уметници.
На 12 мај, пет дена по истекот на рокот за доставување понуди, Бобан Милошески од Авалон и Марија Митева како претставник на Владата одржале прес-конференција на која било најавено дека прославата ќе вклучува настап на Давид Гета и бил претставен концептот.
Од тој момент во јавноста се отворија прашања за тоа колку ќе чини целата прослава. Митева тогаш најавила дека јавноста ќе биде навремено и транспарентно информирана откако ќе бидат финализирани програмските, продукциските и договорните елементи.
Сепак, досега нема официјален податок за вкупната сума потрошена за настаните. На прашањата за трошоците не одговорил ниту Бобан Милошески од Авалон, кој на едно новинарско прашање одговорил со контрапрашање: „Дали ти изгледам како идиот?“.
Во отсуство на официјални податоци, од јавно достапните објави може да се види дека дел од настаните имале и спонзори, меѓу кои и некои од најголемите компании во државата.
Досега се одржани вкупно 16 настани, од кои најголем дел се во рамки на концептот „Силно светнал ден“. Покрај Давид Гета и Хозе Карерас, настапија и светски познати диџеи како Стив Аоки, Пол ван Дајк и Пол Окенфолд.
Перформансот „Силно светнал ден“ го разви продукцијата ОХО, со режисерот Дејан Пројковски.
