ДРЖАВНА ЛОТАРИЈА

Државна лотарија - Поддршка што ја гради заедницата

Среќата не е само добивка, туку и момент кога се гради заедницата. Државна лотарија како општествено-одговорна компанија континуирано ја потврдува својата мисија – преку одговорно приредување игри на среќа, да вложува во спортот, културата, образованието и животната средина.Во спортот, поддршката се и моментите што инспирираат. Државна лотарија ја даде својата поддршка за кошаркарите на КК МЗТ Скопје Аеродром, КК Вибас Баскет и КК Струмица,  баскет турнирот SlamJam Скопје 3x3, кој донесе младинска енергија и натпреварувачки дух, Фудбалската федерација на Македонија и фудбалските клубови Напредок и Лепенец. Истовремено спортските таленти од Карате клуб Аеродром, БК Шкупи, како и борците на КБК Викинг, продолжуваат да ја градат спортската приказна со поддршка што им овозможува подобри услови за тренинг и натпреварување.Кога зборуваме за култура и уметност, Државна лотарија е повторно тука да ја даде својата поддршка. Изминативе месеци оставија вечери што се паметат и денес. Концертот на Владо Јаневски и „Бајага и Инструктори“ ја исполни арената со илјадници посетители, кои заедно пееја, а „Златна бубамара на популарноста“ уште еднаш ја потврди својата улога како најголем музички и забавен спектакл во земјата. Настапот на Хугел (Hugel) донесе светска енергија на скопската сцена, додека концертот на „Мизар“ беше потсетник на култниот статус што оваа група го има во македонската музика.Фестивалот „Видик“ отвори нови перспективи во литературата и културата, а поддршката за албумите на Антониа Гиговска, Пајак и Марија Спасовска, како и за програмските активности на танцовото студио Еурека,  ја потврдува посветеноста на Државна лотарија кон младите артисти и нивните проекти.Меѓу поддржаните настани е и концертот на Јован Јованов и Елвир Мекиќ, кој се одржа во арената „Борис Трајковски“ во Скопје.Ансамблот „Ибе Паликуќа“ со своите настапи во Дубаи ја пренесе македонската традиција на меѓународната сцена, а концертот на Нокаут во арената „Јане Сандански“ беше уште една вечер што ја обедини публиката.Особено значаен е проектот на асоцијацијата „КУЛА – Кратово“, кој со подготовка на фотокнига го документира културното и природното наследство на Осоговието, создавајќи трајна вредност за културниот и туристичкиот развој на регионот. Поддршката се прошири и кон еден од најголемите културни настани во земјата – фестивалот „Охридско лето“, кој секоја година ја збогатува културната сцена со врвни уметнички програми.Во образованието и младинските активности, Државна лотарија ја поддржа Ораторската вечер „Иво Пухан“, како и настаните „Family day“ на здружението „Посветен викенд“.  Поддршка доби и проектот на здружението „Јудбина“, чијашто цел е подигнување на свеста за зачувување на животната средина кај учениците од основните училишта во градот Скопје.Како партнер на многубројни спортски клубови, уметници и културни творци, Државна лотарија ја потврдува важноста дека без поддршка многу од овие приказни не би можеле да се реализираат.На овој начин, Државна лотарија континуирано ја потврдува својата општествена одговорност и улога како двигател на заедницата – создавајќи услови за спортски успеси, културни достигнувања, едукативни иницијативи и еколошка свест.Среќата е насекаде – во игрите, на теренот, во салата, во амфитеатарот, на подиумот, во книгата, во смеата, забавата и песната.ПР

Магазин | пред 5 часа

ВМРО-ДПМНЕ обвинува за милионските злоупотреби во Лотарија под покровителство на Груби: „СДСМ ги толерирала злоупотребите“

Од ВМРО-ДПМНЕ денеска обвинија дека Државна лотарија во периодот кога со институцијата раководел Перпарим Бајрами, а под политичко покровителство на Артан Груби, функционирала како „приватна фирма“, при што, според партијата, биле направени финансиски злоупотреби вредни речиси 1 милион евра.Опозициската партија тврди дека СДСМ ги толерирала овие злоупотреби со цел да се зачува владејачката коалиција и да се остане на власт, повикувајќи се на наоди содржани во извештај на Државниот завод за ревизија.Според соопштението, Државна лотарија директно исплаќала аванси за мали добивки на деловни соработници, односно на 320 правни лица, во износ од околу 14 милиони денари, без да се користи пропишаниот „Мастер дилер“.Од таа сума, како што наведуваат од ВМРО-ДПМНЕ, за околу 13 милиони денари, односно нешто повеќе од 210.000 евра, документацијата била неуредна, невалидна или воопшто недостасувала.Партијата посочува и на спорна и неверодостојна документација во делот на готовинските одливи во износ од 36,5 милиони денари, што е околу 600.000 евра, како и кај приливите од близу 8 милиони денари, односно околу 130.000 евра.Во соопштението се наведува и дека во периодот кога, според нив, се случувале овие злоупотреби, во Државна лотарија немало внатрешен ревизор.Од ВМРО-ДПМНЕ прашуваат дали СДСМ свесно замижала пред, како што велат, криминал тежок речиси 1 милион евра, како и колку пари завршиле во џебовите на Артан Груби и Перпарим Бајрами.Партијата бара Јавното обвинителство да отвори постапка и да истражи каде завршиле средствата, наведувајќи дека молкот на СДСМ отвора сомнеж за можна соучесничка улога со цел да се одржи коалицискиот мир.Во соопштението се додава дека поради предмети кои, според ВМРО-ДПМНЕ, се чуваат во фиока и се заташкуваат од страна на обвинителството, неопходни се реформи во правосудниот систем, со цел законите да важат подеднакво за сите.

Македонија | пред 5 месеци

Државна лотарија демантира: Ревизорските наводи се погрешно интерпретирани и однесуваат на поранешното раководство

Во врска со објавените медиумски написи, во кои се тврди дека Државниот завод за ревизија утврдил значителни неправилности во финансиското работење на Акционерското друштво за приредување игри на среќа – Државна лотарија на Република Северна Македонија за 2024 година, без притоа да се направи јасна и суштинска дистинкција помеѓу периодот на управување од страна на претходното раководство од СДСМ и ДУИ и периодот на работење под новото раководство, Државна лотарија на Република Северна Македонија најостро реагира и го доставува овој демант.Објавените наводи се неосновани, тенденциозни и нецелосни, бидејќи во нив свесно или несвесно не е направена временска и управувачка разграниченост помеѓу периодот во кој Друштвото било управувано од претходното раководство од СДСМ и ДУИ и периодот во кој управувањето и одговорноста ги презема новото раководство. Таквиот пристап создава погрешна слика во јавноста, која доведува до манипулативно поврзување на констатации од различни временски периоди и претставува сериозно отстапување од принципите на објективно, точно и одговорно информирање.Особено нагласуваме дека новото раководство, веднаш по преземањето на функцијата, проактивно и транспарентно се обрати до Државниот завод за ревизија со Барање бр. 02–6328/1 од 12.09.2024 година, со кое иницираше целосна ревизија на финансиските извештаи и на целокупното работење на Друштвото, со цел утврдување на фактичката состојба, идентификација на евентуални неправилности наследени од претходното раководство и воспоставување засилен систем на финансиска дисциплина, отчетност и законитост.Во тој контекст, селективното пренесување на поединечни делови од ревизорскиот извештај, без јасно наведување на временската рамка и одговорното раководство, претставува недозволива медиумска интерпретација која директно го нарушува угледот на Друштвото и на актуелното раководство.Оттука, бараме од медиумите кои објавиле вакви содржини веднаш да ги повлечат или коригираат неоснованите и нецелосно интерпретирани наводи и јасно да направат дистинкција помеѓу периодот на управување на претходното раководство од СДСМ и ДУИ и периодот на новото раководство, и да го усогласат својот текст со принципите на вистинито, целосно и објективно информирање на јавноста.Во спротивно, Државна лотарија на Република Северна Македонија ќе биде приморана да ги искористи сите расположливи правни средства, вклучително и покренување постапки за клевета и нарушување на углед, согласно важечките закони.Новото раководство на Државна лотарија останува цврсто определено кон транспарентно, законито и одговорно работење, како и кон целосна соработка со сите надлежни институции, но истовремено ќе реагира решително против секој обид за дезинформирање на јавноста и политички или медиумски манипулации.

Македонија | пред 5 месеци

Што правела Државната лотарија? Ревизорите открија хаос со пари, нерегуларности и сомнителни трансакции од 2 милиони евра

Државниот завод за ревизија утврди сериозни неправилности, незаконитости и сомнежи за злоупотреба на јавни средства во финансиското работење на АД „Државна лотарија“ за 2024 година, поради што се воздржа од изразување мислење за реалноста и објективноста на финансиските извештаи и даде неповолно мислење за усогласеноста со законската регулатива.Според ревизорскиот извештај, во работењето на друштвото се евидентирани нелогични и непостоечки трансакции, сметководствени записи без соодветна финансиска документација или поткрепени со неверодостојни документи, што отвора сомнеж за злоупотреба на парични средства и незаконско работење со благајната и платежните сметки.Во текот на 2024 година, кај 10 сопствени продажни места на Државна лотарија бил остварен дневен пазар од продажба на лотариски и електронски игри на среќа во износ од 46.039 илјади денари, но овие средства не биле редовно уплатувани на платежните сметки на друштвото, иако законската регулатива обврзува готовинските приходи да се уплатат најдоцна наредниот работен ден. Во текот на целата година, уплата на дневен пазар била извршена само двапати – во април и на крајот на годината – при што ревизорите утврдиле дека уплатените средства не потекнувале од реално примени готовински приходи, туку од подигање готовина од една и уплата на друга сметка на друштвото.Ревизорите констатирале дека не била воспоставена практика за водење благајнички дневник, не се изготвувала соодветна документација за примопредавање на готовината, не постоела прегледност на остварениот дневен пазар и не бил овозможен навремен увид и евидентирање на трансакциите. Дополнително, не бил воспоставен систем на внатрешни контроли, ниту јасно разграничување на надлежностите меѓу вработените.Иако во систематизацијата биле предвидени работни места благајник и шеф на сметководство, најголем дел од активностите поврзани со прием, ракување и евидентирање на готови пари ги извршувало едно лице – директорот на Секторот за финансии и сметководство. Во друштвото воопшто не функционирала внатрешната ревизија, што, според ДЗР, придонело недозволените и незаконски активности да останат неоткриени.Ревизијата утврдила дека директорот на Секторот за финансии и сметководство директно исплаќал аванси за мали добивки на дел од деловните соработници во износ од 13.971 илјади денари, без користење на пропишаниот механизам преку мастер дилер. За најголемиот дел од овие трансакции, во износ од 13.054 илјади денари, не била доставена уредна и валидна документација или воопшто немало документи, што создава несигурност за вистинитоста на евидентираните настани. Забележани се и случаи во кои на ист ден на исти деловни соработници им биле исплатени средства и преку благајна и преку мастер дилер, без логично објаснување.Кај одливите и приливите на готовина по основ на дадени и вратени аванси за исплата на мали добивки, во вкупен износ од над 44 милиони денари, ревизорите утврдиле дека поткрепувачката документација е спорна и неверодостојна. Дополнително, обезбедени се писмени изјави од вработени во друштвото со тврдење дека за наведените износи не биле примени ниту вратени аванси, што упатува на сомнеж за сериозни нерегуларности и можна злоупотреба на парични средства.Преку анализа на трговските книги, податоците од централниот онлајн систем и платформите за интернет игри на среќа, ревизорите утврдиле нереални и неоправдани сметководствени записи за нелогични трансакции по повеќе основи во вкупен износ од 122.490 илјади денари, што претставува сериозен сомнеж за злоупотреба на јавни средства.Во делот на инстант лотаријата, ревизорите утврдиле дека евидентираниот износ на неисплатениот фонд на добивки е за 63.294 илјади денари помал од износот според централниот онлајн систем, што не е во согласност со правилата на играта и ја доведува во прашање исплатата на идните добивки. За три инстант игри со добивки во предмети – станови, автомобили и електрични скутери – не била воспоставена сметководствена евиденција за набавените добивки, набавките биле вршени пред одобрување на правилата од Министерството за финансии, а не биле евидентирани трошоци и обврски во значителни износи.Во 2024 година за реклама, пропаганда, промоција и саеми биле потрошени 220.823 илјади денари, што е десет пати повеќе во однос на 2020 година. Ревизијата утврдила неправилности во јавните набавки за маркетинг, недостиг на прецизни договорни одредби, недоставени медија планови и извештаи, фактури без детален опис и сомнеж во оправданоста на дел од исплатените средства. Забелешки по овој основ утврдила и Управата за јавни приходи.Ревизорите изразиле сомнеж и за оправданоста на средствата потрошени за организирање настани, телевизиски продукции и услуги од маркетинг агенции, при што дел од емисиите за кои било платено не биле доставени, а за други биле исплатени повисоки износи од реалните.Неправилности се утврдени и при набавка на опрема, каде дел од опремата не одговарала на техничките спецификации, а со пописот бил утврден и кусок. Во делот на закупите, ревизијата покажува нерационално користење на јавни средства, зголемување на трошоците и плаќање закупнини за простори кои не биле користени. Забележани се и нерегуларности при реконструкција и реновирање на објекти, со утврдени неосновано поголеми износи.Ревизорите утврдиле и сериозни слабости во јавните набавки, со голем број постапки со една понуда, рамковни спогодби со еден оператор и избегнување на Законот за јавни набавки. Констатирани се и незаконски исплати по договори за дело, неправилности кај службените патувања, репрезентацијата, одржувањето на возила и други трошоци.Во извештајот се наведува дека за сите утврдени неправилности, незаконско користење на средства и сомнежи за незаконско работење, Државниот завод за ревизија ги известил надлежните институции за понатамошно постапување и дал конкретни препораки за отстранување на слабостите и унапредување на финансиското и материјалното работење на АД „Државна лотарија“.

Македонија | пред 5 месеци

Со тврдење за нов криминал во „Државна лотарија“ уапсен газда на приватна фирма

Уапсен е Артан Ајрули, сопственик на фирмата „Ритрон Копи“ од Куманово. Неговото апсење доаѓа по проширувањето на истрагата за злоупотреба во Државна лотарија, за што се обвинети Бајрами и поранешниот вицепремиер Артан Груби, кои веќе се во бегство.Со потпис на директорот Перпарим Бајрами, од 2022 до 2024 година се исплаќале лажни фактури подготвени од газдата на „Ритрон Копи“, Артан Ајрули. Бајрами со народни пари плаќал телевизори, принтери, комјутерска и комуникациска опрема, која, ниту – соодвестувала, со она што го пишувало во трите договори, а ниту пак ја доставиле. Двајцата си наместиле уште три тендери.„Второпријавениот А. А. тие информации ги искористил за однапред да изврши увоз на типови и модели на употребувани телевизори по договорените количини, со што бил доведен во поповолна положба во однос на сите други понудувачи во спроведените постапки за јавни набавки.. на телевизори за инсталација на електронски игри, со што првопријавениот П.Б му овозможил на второпријавениот А. А и петтопријавениот правен субјект ДПТУ РИТРОН КОПИ ДООЕЛ Куманово да се стекнат со противправна имотна корист по три склучени договори за јавни набавки на телевизори во вкупна вредност од 12.980.000,00 денари“, стои во пријавата од Финансиска.Според полицијата, Ајрули ги искористил информациите за предувоз на договорените типови и модели на телевизии и со тоа се ставил во поволна позиција пред другите понудувачи. Со ова, според Финансиската полиција, Бајрами им овозможил на Ајрули и на неговото правно лице „Ритрон Копи“ да имаат незаконски имот во три договори за набавка на телевизори од над 200 илјади евра.Претходно, ВЛЕН ја обвини компанијата „Ритрон Копи“ за злоупотреба на тендерите. Според нив, Ајрули и неговата компанија се блиски до пратеникот на Европскиот фронт, Елми Азири

Македонија | пред 1 година