Долниот дом на италијанскиот парламент денеска го одобри контроверзниот предлог на владата на премиерката Џорџа Мелони за измени на изборниот закон, кој сега ќе биде испратен на разгледување и гласање во Сенатот.
Предлогот на владејачката десничарска коалиција, составена од партиите „Браќа на Италија“, „Форца Италија“ и „Лига“, беше усвоен со 217 гласа „за“ и 152 „против“.
Со реформата се предвидува воведување целосно пропорционален изборен систем, при што коалиција што ќе освои повеќе од 42 проценти од гласовите ќе добие дополнителни пратенички места за да обезбеди стабилно парламентарно мнозинство.
Според предлогот, победничкиот блок би добил дополнителни 70 места во Долниот дом и 35 во Сенатот, но неговото вкупно претставување би било ограничено за да се избегне преголемо мнозинство.
Опозицијата ја критикува реформата, оценувајќи дека таа има за цел да ѝ помогне на премиерката Мелони да ја задржи власта по парламентарните избори во 2027 година.
Предлогот предизвика несогласувања и во самата владејачка коалиција, откако беше отфрлена идејата за воведување преференцијално гласање за кандидатите на партиските листи.
Реформата, меѓу другото, предвидува укинување на изборните единици во кои победникот ги освојува сите гласови, систем што, според аналитичарите, досега ѝ одел во прилог на опозицијата, особено во јужниот дел на Италија.
Во меѓувреме, владејачката коалиција се соочува и со раст на поддршката за новото крајнодесничарско движење „Национална иднина“, предводено од поранешниот генерал Роберто Ваначи, кое, според анкетите, има повеќе од шест проценти поддршка.
