Мелони им дозволува на Италијанците да избираат сопствени регистарски таблички

Италијанската влада планира да им овозможи на возачите да избираат персонализирани регистарски таблички за своите возила, со што се очекува да се зголемат приходите во државниот буџет.

— реклама —

Мерката ја најави премиерката Џорџа Мелони при претставувањето на предлог-буџетот за 2027 година. Таа оцени дека новината ќе им овозможи на граѓаните да ја изразат својата креативност, но за тоа ќе треба да платат.

— реклама —

Според предложената мерка, персонализирана регистарска табличка за автомобил ќе чини околу 600 евра, а за мотоцикл 360 евра. Италијанското Министерство за финансии засега не објавило колкави приходи очекува од оваа новина. Сè уште не е познато ниту колку возачите ќе можат да отстапуваат од досегашниот формат на табличките.

Предлогот предизвика поделени реакции. На социјалните мрежи се појавија шеги и мемиња, а дел од граѓаните изразија загриженост дека персонализираните таблички би можеле да се користат за навредливи пораки.

— реклама —

Мерката ја поздравија таксистите, кои сметаат дека посебните таблички би можеле да помогнат во препознавањето на легалните превозници и сузбивањето на нелегалниот превоз.

Од друга страна, опозициските партии ја обвинија владата дека со оваа иницијатива го одвлекува вниманието од поважните проблеми што не се решени со буџетот. Франческо Силвестри од Движењето пет ѕвезди порача дека Италијанците веќе ја избрале својата персонализирана табличка, на која, според него, пишува: „Мелони, замини си“.