СДСМ денеска преку соопштение ги обвини ВМРО-ДПМНЕ и Левица дека, како што наведува, заеднички го блокираат европскиот пат на Македонија и ја спречуваат државата да ги искористи придобивките од процесот на евроинтеграција.
Во партиското соопштение, СДСМ ги отфрла, како што наведува, обвинувањата и пропагандата што доаѓаат од ВМРО-ДПМНЕ и Левица, оценувајќи дека јавноста се доведува во заблуда околу причините за загубата на европски средства.
Од партијата тврдат дека Левица има јасно изразени ставови против членството во Европската Унија и НАТО, додека за ВМРО-ДПМНЕ велат дека јавно се претставува како проевропска, но во пракса, според нив, ги блокира реформите и создава пречки за продолжување на евроинтегративниот процес.
СДСМ оценува дека последиците од ваквите политики не се ограничуваат само на, како што наведуваат, загубата на четири милиони евра, туку дека државата губи можности за користење европски фондови, нови инвестиции и подобар животен стандард за граѓаните.
Од партијата порачуваат дека Македонија заслужува да продолжи по европскиот пат и да не биде, како што велат, заложник на политики што ја држат државата во изолација.
