Премиерот Христијан Мицкоски изјави дека Владата успешно ги менаџира економските и политичките предизвици и дека државата бележи шест последователни квартали со реален раст на БДП над 3,5 проценти.
На Самитот 2026 во организација на Македонија 2025, Мицкоски рече дека најголем предизвик е справувањето со, како што наведе, „товарот од минатото“.
Тој истакна дека конфликтот во Заливот влијаел врз економските движења, но оцени дека Владата успешно се справила со последиците и покрај големите фискални откажувања.
„Ние имаме шест квартали по ред како Влада со 3,5 проценти, над 3,5 проценти реален раст“, изјави Христијан Мицкоски.
Според него, еден од клучните приоритети на Владата е инфраструктурното поврзување преку Паневропските коридори VIII и X, кои ги оцени како најголема компаративна предност на државата.
Премиерот најави дека Владата работи на завршување на патната и железничката инфраструктура на Коридорот 8, реконструкција на пругата Табановце–Гевгелија на Коридорот 10, како и изградба на гасни интерконектори со Грција и Србија.
Во однос на евроинтеграциите, Христијан Мицкоски рече дека Владата има поинаков пристап од претходната власт и дека нема да прифати, како што рече, „понижувачки пат“ кон членството во Европска Унија.
„Достоинството нема цена“, порача премиерот.
