Дождот и маглата ги заробиле на Пирибег: ЦУК координирал акција за спасување на двајца странски планинари

Двајца странски државјани кои планинареле кон врвот Пирибег биле затекнати од неповолни временски услови и се засолниле во планинарски објект во близина на границата со Косово. По координирана акција на надлежните служби од двете земји, планинарите се пронајдени во добра здравствена состојба и се транспортирани кон Штрпце, на косовска територија, информира Центарот за управување со кризи (ЦУК).

Пријавата за двајцата планинари била примена денеска во 08:22 часот преку Единствениот број за итни повици 112. По проверката на условите за пристап до локацијата било утврдено дека од македонска страна до објектот може да се стигне единствено пеш, а поради временските услови патувањето би траело повеќе од шест часа во еден правец. Хеликоптерски пристап не бил можен поради дождот и маглата.

— реклама —

Како посоодветна опција било оценето извлекување од косовска страна, каде што постои пристапен пат од скијачкиот центар Брезовица до објектот во кој се засолниле планинарите.

Веднаш по добивањето на пријавата, Регионалниот центар за управување со кризи – Тетово ги известил надлежните служби, меѓу кои Полициската станица Теарце, Центарот за итни случаи – Тетово и Дирекцијата за заштита и спасување – Подрачното одделение Тетово.

— реклама —

Во координацијата биле вклучени и ЈП „Национални шуми“ – подружница Тетово, како и Службата за пребарување и спасување во планина на Косово, со цел да се организира безбедно извлекување на лицата.

— реклама —

Во 11:45 часот, Дежурниот оперативен центар при ЦУК воспоставил директна комуникација со еден од планинарите преку телефонски разговор и СМС-порака, при што лицето било информирано дека екипа од Косово ќе пристигне за да ги извлече.

Според информациите добиени од косовската служба за пребарување и спасување во планина, екипите постојано биле во контакт со планинарите, за кои било потврдено дека се во добра здравствена состојба.

Во 16:50 часот, ЦУК добил потврда дека двајцата странски државјани се пронајдени во добра состојба и се транспортираат кон Штрпце, во Република Косово.

Од ЦУК информираат дека во текот на целата акција ја координирале комуникацијата со надлежните служби од Северна Македонија и Косово, со цел безбедно извлекување на двајцата планинари.