Непријатен инцидент се случил на плажа во грчкото туристичко место Пефкохори на Халкидики, откако жена била нападната од рибата зајак, позната и како лагокефалос, додека влегувала во морето.
Како што изјавила за грчката телевизија ANT1, таа била на плажа со пријатели и влегла во водата, која ѝ била до колена, кога одеднаш почувствувала силна болка во ногата.
„Реков: ‘Нешто ме гризе и не ме пушта’. Погледнав надолу и видов огромна риба. Знаев како изгледа лагокефалосот, бидејќи претходно бев информирана. Сфатив дека е тоа, се исплашив и почнав да ја тресам ногата за да се ослободам, бидејќи ме касна и не ме пушташе. Веднаш излегов од морето, бев во паника и почнав да плачам“, раскажала жената.
Нејзините пријатели веднаш забележале дека нешто не е во ред и излегле од водата заедно со неа.
Жената посочила дека имала среќа бидејќи рибата ја каснала во пределот на глуждот, каде што коската спречила подлабоко оштетување.
„За среќа, ме касна точно преку коската на глуждот, па забите не успеаја да навлезат подлабоко во ткивото. Сепак, ми остави голема и видлива рана“, изјавила таа.
Присутните на плажата веднаш ѝ укажале прва помош и успеале да го запрат крварењето, по што била пренесена во локален здравствен центар. Таму примила серум против тетанус, антибиотска терапија, а раната била исчистена и санирана.
„Нема никаква можност да станува збор за друга риба. Јасно ја видов и невозможно е да ја помешам со друг вид“, додала таа.
Грчкиот Црвен крст претходно предупреди за зголеменото присуство на рибата зајак во грчките води.
Лагокефалосот, познат и како риба пуфер, се смета за еден од најинвазивните видови во Средоземното Море. Рибата има исклучително силни вилици и остри заби, кои можат да предизвикаат сериозни повреди. Експертите сметаат дека нејзиното сè почесто присуство во Егејското и Јадранското Море е последица на промените во температурата на морето.
