Токсичната „риба зајак“ (Lagocephalus sceleratus), која за првпат беше регистрирана во грчките води во 2005 година, продолжува брзо да се шири и денес е присутна долж голем дел од крајбрежјето и островите во Грција, пренесува грчкиот медиум Radiome.
Според информациите, за полесно информирање на јавноста и спречување несакани инциденти, грчката мрежа за рано предупредување за инвазивни видови ELNAIS објави интерактивна дигитална мапа преку Google My Maps, на која се прикажани сите досега регистрирани локации каде што е забележана оваа опасна риба на Крит, во Егејското Море и долж грчкото крајбрежје.
„Рибата зајак“ е инвазивен вид кој во Средоземното Море навлегол од Црвеното Море преку Суецкиот Канал. Оттогаш нејзината популација постојано расте, а научниците предупредуваат дека претставува сериозна закана за морскиот екосистем, бидејќи ги напаѓа домашните видови риби и ја нарушува природната рамнотежа.
Поради сериозноста на проблемот, грчкото Министерство за рурален развој подготвува програма со финансиски стимулации за рибарите што ќе ја ловат оваа риба, со цел да се ограничи нејзиното понатамошно ширење.
Во меѓувреме, Грчкиот Црвен крст објави и препораки за постапување доколку дојде до повреда од „рибата зајак“. Иако нејзиниот угриз не е отровен, експертите предупредуваат дека нејзините исклучително силни вилици, кои наликуваат на клун, можат да предизвикаат тешки повреди и обилно крвавење.
Властите апелираат граѓаните и туристите да бидат внимателни доколку ја забележат оваа риба и да избегнуваат контакт со неа, а секое забележување да го пријават до надлежните служби.
