Серијата пожари во Србија продолжува да создава сериозни проблеми за противпожарните екипи, а во изминатото деноноќие е регистрирана и првата жртва. Секторот за вонредни ситуации вчера интервенирал 201 пат, од кои 146 интервенции биле поради пожари на отворен простор.
Најкритична е состојбата во Делиблатската Песочара, каде што огнената стихија зафатила околу 3.500 хектари шума и ниска вегетација. Според надлежните, засега нема опасност за населението и имотите, но пожарот активно се гасне и се работи на негово ограничување.
На терен се ангажирани 345 лица, со 95 возила и 37 работни машини. Во акцијата е вклучен и противпожарен брод, кој се користи за снабдување со вода на екипите. Во зависност од временските услови, повторно се очекува да бидат ангажирани и хеликоптери на Министерството за внатрешни работи.
Пожарите кај Бованското Езеро и на Столови се во помирна состојба. Во околината на Бован изгореле околу 60 хектари, додека на подрачјето на Столови пожарот зафатил околу 200 хектари шума и ниска вегетација. Екипите и натаму остануваат на терен.
Како најголеми пречки во гаснењето се издвојуваат непристапниот терен и силниот ветер. Во Делиблатската Песочара возилата тешко се движат поради големите количества песок, додека променливиот правец на ветерот дополнително го отежнува контролирањето на огнот и го забрзува неговото ширење.
Од почетокот на годинава Секторот за вонредни ситуации имал околу 24.000 интервенции, од кои половина биле поврзани со пожари на отворен простор. Во овие пожари досега загинале четири лица.
