Дрон од правец на Белорусија крена борбени авиони на НАТО, затворен аеродромот во Вилнус

Аеродромот во главниот град на Литванија, Вилнус, утрово беше привремено затворен, а НАТО крена борбени авиони од мисијата за воздушно патролирање над Балтикот по пријава за сомнителен дрон кој се движел од правец на Белорусија кон литванскиот воздушен простор.

Како што соопшти литванскиот Национален центар за управување со кризи, аеродромот беше затворен помалку од еден час, по што воздушниот сообраќај повторно беше воспоставен.

— реклама —

Надлежните служби во текот на денот работат на утврдување на сите околности и точната причина поради која била активирана тревогата.

По забележувањето на сомнителниот објект, властите ги предупредиле и жителите во регионот на Вилнус да бидат подготвени да побараат засолниште доколку биде потребно.

— реклама —

Инцидентот доаѓа во период на зголемена претпазливост на источното крило на НАТО по повеќе случаи со беспилотни летала во близина или во воздушниот простор на земјите од регионот.

— реклама —

Литванија веќе имаше сериозен инцидент во септември, кога дрон што влезе во нејзиниот воздушен простор беше соборен од италијански борбен авион ангажиран во мисијата на НАТО. Литванските власти тогаш соопштија дека првичните податоци покажувале оти леталото влегло од Белорусија, а подоцна била пронајдена и неговата експлозивна направа.

Неколку дена претходно, друга тревога за можен дрон над Литванија доведе до затворање на аеродромот во Вилнус и кревање борбен авион на НАТО, но подоцна беше утврдено дека станувало збор за јато птици.

— реклама —

Поради повторените инциденти со беспилотни летала на источното крило, НАТО најави дополнително зајакнување на интегрираната воздушна и противракетна одбрана, како и развој на дополнителни капацитети за откривање и неутрализирање дронови.

Засега нема официјална потврда за потеклото и типот на објектот поради кој денес беше активирана тревогата во Литванија. Истрагата за инцидентот продолжува.