Демократската унија за интеграција (ДУИ) реагира на спотот што Владата го објави по повод 35-годишнината од независноста на државата, оценувајќи дека во него е претставена еднонационална верзија на историјата, во која практично отсуствуваат Албанците.
Од партијата велат дека спотот е целосно на македонски јазик, со македонски уметници, додека придонесот на Албанците во развојот на државата не е прикажан. Според ДУИ, особено загрижувачки е што во содржината не се опфатени повеќе настани кои ги сметаат за клучни за современата историја на земјата.
Како пример го посочуваат Охридскиот рамковен договор, кој беше потпишан по конфликтот во 2001 година и со кој, според ДУИ, беа поставени темелите на мултиетничкиот карактер на државата.
Во спотот, според партијата, не се споменуваат ниту членството во НАТО, ниту Првата меѓувладина конференција со Европската Унија и почетокот на пристапниот процес.
ДУИ оценува дека станува збор за значајни моменти кои ја определиле насоката на државата и смета дека нивното изоставување покажува каква визија има актуелната Влада за државата.
Од партијата реагираат и на изборот на една од централните фигури во спотот, Игор Дурловски, кого го поврзуваат со настаните од 27 април 2017 година и насилниот упад во Собранието.
„Албанците можеби ги има на списокот на министри, но ги нема во приказната на државата“, наведуваат од ДУИ, додавајќи дека 35-годишнината требало да биде можност да се прикаже заедничкиот пат на сите граѓани и заедничката иднина на државата.
ДУИ ја обвинува Владата дека со ваквиот пристап го потиснува значењето на Охридскиот договор и создава слика за држава во која Албанците се исклучени од официјалниот наратив.
Од партијата оценуваат дека ваквиот пристап претставува чекор назад и порачуваат дека, според нив, не смее да се дозволи исклучувањето на една заедница да стане нормална политичка практика.
