ДУИ обвинува дека власта систематски ги исклучува Албанците од структурите на редот и безбедноста, откако, според партијата, од 310 примени кандидати во средното полициско училиште, само 11 отсто се припадници на немнозинските заедници.
Од ДУИ велат дека учеството на Албанците меѓу примените кандидати е помало од три отсто, поради што бараат конкурсот да биде повторен и да се почитува принципот на правична и соодветна застапеност на сите заедници.
„Истовремено, бараме во структурите на полицијата, редот и безбедноста да се воспостават јасни, мерливи и задолжителни механизми за правична и соодветна застапеност, од регрутирањето до раководните позиции. Не може да се дозволи она што се градеше со години да биде поништено за само две години и Албанците да бидат сведени на институционален декор“, велат од ДУИ.
Партијата бара и политичка одговорност и оставка од заменик-министерот за внатрешни работи Астрит Исени од коалицијата ВЛЕН. Од ДУИ велат дека неговото формално присуство на функцијата не може да биде оправдување за, како што тврдат, исклучувањето на Албанците од институциите.
Од опозициската партија оценуваат дека проблемот не се однесува само на еден конкурс или поединец, туку на еднаквоста, мултиетничкиот карактер на државата и почитувањето на Охридскиот рамковен договор.
„Албанците не бараат привилегии, туку правична застапеност“, додаваат од ДУИ.
Според партијата, особено загрижувачки е тоа што, покрај Албанците, ваквата состојба ги засега и другите немнозински заедници. Од ДУИ предупредуваат дека на тој начин се создава институционална супремација и се продлабочува поделбата меѓу граѓаните.
