ДУИ бара оставка од Астрит Исени по наводите за полициско насилство врз две млади лица: МВР го истражува случајот

Демократската унија за интеграција (ДУИ) преку соопштение бара оставка од заменик-министерот за внатрешни работи Астрит Исени и целосно расветлување на случајот со двајца млади на возраст од 21 и 23 години, кои тврдат дека биле физички малтретирани од полициски службеници.

— реклама —

Според соопштението на ДУИ, во интерниот полициски извештај се наведува дека младите му го одзеле пиштолот на полициски службеник. Тие, пак, тврдат дека оружјето завршило во нивното возило откако полицијата го скршила стаклото. Според нивните изјави, полициските службеници пукале со огнено оружје, им ги дупнале гумите на автомобилот, а потоа ги врзале и ги легнале на земја, при што биле малтретирани.

— реклама —

ДУИ бара итна, непристрасна и транспарентна истрага, како и утврдување одговорност доколку се потврди дека полициските службеници ги прекршиле своите овластувања.

„Правата и достоинството на граѓаните не смеат да бидат повредувани од оние чија должност е да ги штитат“, наведуваат од партијата, барајќи целосна институционална одговорност.

— реклама —

Во меѓувреме, Министерството за внатрешни работи соопшти дека министерот наложил Одделот за внатрешна контрола, криминалистички истраги и професионални стандарди да го испита случајот, по објавите дека на 7 октомври во Скопје две лица биле физички нападнати од полициски службеници и дека им бил оштетен автомобилот.

Од МВР информираат дека се преземаат мерки за утврдување на фактичката состојба и околностите на настанот, како и за евентуалната одговорност на инволвираните службеници. По завршувањето на проверките, ќе бидат преземени соодветни законски мерки, а јавноста ќе биде известена.