ДУИ честитаат Илинден: Охридскиот договор е под постојани обиди за поткопување

Демократската унија за интеграција (ДУИ) по повод 2 Август – Илинден порача дека празникот потсетува на идеалите за слобода, еднаквост и соживот, но оцени дека државата денес се оддалечува од тие вредности.

„2 Август нѐ потсетува на еден од најблагородните идеали на нашата заедничка историја - уверувањето дека слободата не се гради врз надмоќта на едните над другите, туку врз еднаквоста, почитта и соживотот. Духот на Крушево беше повик за држава во која Албанците, Македонците и сите заедници ќе ја споделуваат одговорноста и заедничката судбина“, наведуваат од ДУИ.

— реклама —

Од партијата оценуваат дека, наместо партнерство и инклузивност, во државата се враќа логиката на доминација и исклучување.

„Албанците сѐ повеќе се маргинализираат во државните институции, администрацијата, дипломатијата, безбедносниот сектор, правосудството, образованието, културата, здравството, економијата и во процесите на одлучување што ја определуваат иднината на државата“, стои во соопштението.

— реклама —

ДУИ наведува дека Охридскиот мировен договор, кој го оценува како современо продолжение на духот на Крушевскиот манифест, се соочува со постојани обиди за негово поткопување.

— реклама —

„Нападите врз службената употреба на албанскиот јазик, укинувањето на механизмот што гарантираше правична и соодветна застапеност, нападите и слабеењето на механизмот за заштита од мајоризација, непочитувањето на реалноста утврдена со пописот на населението, селективната правда и промовирањето на моноетнички концепт на државата се сериозни сигнали за насоката во која се движи земјата“, велат од партијата.

Во честитката се наведува и дека дел од албанските политички претставници, според ДУИ, наместо да ги бранат интересите на граѓаните, избрале „потчинување пред власта“.

Сепак, од ДУИ порачуваат дека нивната определба останува за заедничка, демократска и европска Северна Македонија.

„На овој симболичен ден, да се потсетиме дека иднината не се гради со поделби, страв или исклучување. Таа се гради така што оваа држава ќе ја гледаме не како сопственост на едните или на другите, туку како наша заедничка татковина. Само врз темелите на еднаквоста, меѓусебната почит и искреното партнерство можеме да изградиме силна држава и сигурна иднина за сите“, порачуваат од ДУИ.