ДУИ: Дивоградбата на државно земјиште повторно се гради, Град Скопје и Општина Чаир молчат

Нови градежни активности повторно се одвиваат на објектот на улицата „Ќемал Сејфула“ во Чаир, кој минатата година беше пријавен како дивоградба на државно земјиште, обвинуваат од ДУИ преку соопштение. Од партијата прашуваат како е овозможено продолжувањето на работите и зошто надлежните институции не реагираат.

— реклама —

Случајот беше актуелизиран во мај 2025 година, кога тогашната градоначалничка на Скопје, Данела Арсовска, излезе на терен и посочи дека објектот се гради без проект и без одобрение за градба, на околу еден метар од постојната станбена зграда.

По пријавата, Обвинителството отвори истрага против инвеститорот. Според тогашните информации, станувало збор за шесткатен станбено-деловен објект што се градел без одобрение и на државно земјиште, а било предложено и запирање на градежните работи.

— реклама —

Работите тогаш биле прекинати, но, според ДУИ, по една година на локацијата повторно се присутни работници и градежна механизација.

— реклама —

Од партијата тврдат дека жителите на соседните објекти повторно се соочуваат со изградба што им го ограничува погледот и просторот пред прозорците и балконите, додека од Општина Чаир, како што наведуваат, нема јавно објаснување за продолжувањето на работите.

ДУИ бара Општина Чаир итно да изврши инспекциски надзор и да информира врз основа на која документација се продолжени градежните активности, дали постои важечко одобрение за градба и што презел општинскиот инспекторат.

Од партијата бараат и Обвинителството да ја информира јавноста докаде е истрагата и како било овозможено продолжувањето на работите на објектот.