Демократската унија за интеграција (ДУИ) обвини дека Владата ги оставила граѓаните сами да се справуваат со, како што велат, најголемото поскапување на дизелот во последните години.
Од партијата наведуваат дека за помалку од еден месец цената на дизелот се зголемила од 82,5 на 99,5 денари за литар, што претставува раст од 20,6 проценти. Според ДУИ, тоа е речиси четирипати поголемо зголемување од просекот во земјите на Европската Унија во истиот период.
„Ова поскапување ќе значи повисоки трошоци за транспортот, храната, земјоделците и бизнисите, а на крајот сето тоа ќе се одрази врз цените што ги плаќаат граѓаните“, велат од ДУИ.
Партијата оценува дека додека други држави воведуваат мерки како намалување на акцизите и субвенции, во Македонија цената на дизелот се приближува до 100 денари за литар, што, според нив, ќе предизвика нов бран поскапувања.
