Демократската унија за интеграција (ДУИ) преку соопштение обвини дека формирањето на Стручната комисија за разгледување на случаите на пациенти со малигни заболувања на Универзитетската клиника за хематологија, без лекар Албанец во нејзиниот состав, претставува продолжување на, како што наведуваат, политиката на институционално исклучување на Албанците.
Од партијата оценуваат дека ова не е изолиран случај, туку дел од, според нив, двегодишен процес на систематско отстранување на Албанците од позиции на одлучување, управни одбори, комисии, раководни тела и државни институции.
„Денес на оваа листа се додава и една стручна комисија со директна одговорност за одлучување и давање препораки за лекување на пациенти со малигни заболувања, во која не се нашло место ниту за еден лекар Албанец“, наведуваат од ДУИ.
Од партијата тврдат дека станува збор за политичка одлука и ја обвинуваат Владата на ВМРО-ДПМНЕ и коалицијата ВРЕДИ дека градат, како што велат, моноетнички институции. Воедно, упатуваат критики и до ВРЕДИ, обвинувајќи ја дека не реагира на, според нив, дискриминаторските одлуки.
ДУИ оценува дека ветувањата за правична и соодветна застапеност не се реализираат во пракса и тврди дека Албанците се систематски исклучуваат од институциите.
Од партијата бараат итно преиспитување на одлуката за составот на Комисијата и доследно почитување на уставниот принцип на правична и соодветна застапеност.
