Продолжуваат политичките препукувања меѓу ДУИ и коалицијата ВРЕДИ, откако ДУИ обвини дека со влегувањето на ВРЕДИ во Владата е овозможено засилување на влијанието на таканаречениот „српски свет“ во Македонија.
Од ДУИ преку соопштение посочуваат дека две години по ред во извештаите на Европскиот парламент се изразува загриженост поради растечкото влијание на овие политики во земјата, при што, како што наведуваат, се посочуваат и претставници на актуелната власт.
Во реакцијата се наведува дека присуството на Иван Стоилковиќ во Владата, приближувањето кон политичките структури на Милорад Додик, како и договорите во енергетскиот сектор со компании кои, според ДУИ, се поврзуваат со неговите интереси, претставуваат показатели за ваквото влијание.
Партијата укажува и на, како што наведува, проширување на српскиот банкарски капитал во земјата, оценувајќи дека паралелно се одвива и систематско нарушување на Охридскиот рамковен договор преку одлуки на Уставниот суд и политиките на Владата. Според ДУИ, ВЛЕН не е само набљудувач, туку активно учествува во овие процеси.
На обвинувањата реагираше коалицијата ВРЕДИ, која во своето соопштение ја критикува ДУИ, обвинувајќи ја дека со години ги користела институциите за партиски интереси, а сега, откако е во опозиција, се обидува да ги блокира реформските процеси.
Од ВРЕДИ велат дека ДУИ не ја брани албанската кауза, туку сопствените политички позиции, обвинувајќи ја дека во изминатите 25 години не обезбедила законско решение за правичната застапеност, иако била дел од власта.
Во реакцијата додаваат дека Албанците не се ничиј партиски плен и дека Охридскиот рамковен договор не ѝ припаѓа на ниту една политичка партија, туку на сите граѓани. Според ВРЕДИ, правата на Албанците не треба да се користат како средство за политички пресметки.
