„Ослободувањето на Артан Груби и Перпарим Бајрами претставува скандал и отворено исмевање на државните институции“, велат од ВРЕДИ

Ослободувањето на Артан Груби и Перпарим Бајрами предизвика остри реакции од коалицијата ВРЕДИ, од каде што оценуваат дека станува збор за сериозен скандал и потценување на државните институции.

— реклама —

Во реакцијата, ВРЕДИ изразува сомнеж за околностите под кои двајцата се најдоа на слобода и бара итно објаснување од надлежните судски и обвинителски органи. Од коалицијата особено го посочуваат случајот со поранешниот директор на Државна лотарија, Перпарим Бајрами, кој, според нивните наводи, е пуштен од притвор со гаранција од 1,2 милиони евра, додека Груби претходно бил ослободен од куќен притвор.

— реклама —

ВРЕДИ во своето соопштение поставува прашања за можни влијанија и поврзаности во правосудниот систем, споменувајќи ги и поранешниот директор на УБК, Сашо Мијалков, како и измените на Кривичниот законик. Притоа потсетуваат дека Груби се наоѓа на американската црна листа поради, како што наведуваат, коруптивни активности поврзани со Мијалков.

— реклама —

Од коалицијата бараат надлежните институции да ги објаснат одлуките и најавуваат дека ќе ги искористат сите институционални механизми за утврдување на одговорноста. Истовремено, повикуваат на зголемено внимание од меѓународната заедница и странските амбасади, со цел да се следат транспарентноста на постапките и почитувањето на владеењето на правото.

— реклама —

„Груби и Бајрами не можат да бидат над законот. Никој не смее да ја избегне одговорноста. Ќе има одговорност. Правдата ќе ги стигне сите“, порачуваат од ВРЕДИ.