„Народот едвај врзува крај со крај, а за пасошот на Груби се ставаат на маса над 335 илјади евра“, велат од ВРЕДИ

ВРЕДИ реагира на барањето на Артан Груби да му биде вратен пасошот, посочувајќи дека неговата одбрана како гаранција понудила недвижен имот во вредност од 335 илјади евра.

Од ВРЕДИ прашуваат чиј е имотот што е понуден како гаранција и на кој начин е стекнат, нагласувајќи дека станува збор за сума која, според нив, отвора прашања во јавноста.

— реклама —

„Граѓаните знаат колку години работа се потребни за да се обезбеди покрив над глава. Затоа оваа сума паѓа во очи. Народот едвај врзува крај со крај, а за пасошот на Груби се ставаат на маса над 335 илјади евра“, наведуваат од ВРЕДИ.

— реклама —

Партијата поставува прашање дали имотот е во сопственост на Груби и како можел да биде стекнат со оглед на неговите примања како функционер.

Во реакцијата ВРЕДИ го обвинува Груби и ДУИ дека во периодот кога биле на власт не успеале да создадат услови поради кои младите би ја гледале иднината во земјата. Од партијата тврдат дека голем број семејства биле принудени иднината да ја бараат во странство, додека раководството на ДУИ продолжило да бара поддршка од граѓаните.

— реклама —

ВРЕДИ дополнително потсетува на американските санкции кон Груби, наведувајќи ги обвинувањата за корупција и мешање во правосудството како дел од својата политичка критика.

— реклама —

„Албанците скапо ги платија политиките на ДУИ, со изгубени години и разделени семејства. Народот се разделуваше од децата, а раководството на ДУИ не се разделуваше од фотелјите“, се наведува во реакцијата.

Од ВРЕДИ додаваат дека додека Груби бара да му биде вратен пасошот, граѓаните, како што велат, бараат нивните деца да се вратат дома.