ВРЕДИ јавно реагираше по пресудата против Хашим Тачи, Кадри Весели, Јакуп Красниќи и Реџеп Селими, изразувајќи разочарување поради судската одлука, но истовремено упатувајќи критики кон ДУИ и Али Ахмети.
Од ВРЕДИ велат дека, без оглед на пресудата, нивниот став за војната на Ослободителната војска на Косово останува непроменет. Според нив, станувало збор за „праведна и ослободителна војна“ против режимот на Слободан Милошевиќ.
Во реакцијата, ВРЕДИ ја обвинува ДУИ дека се обидува да ја искористи чувствителната тема за политички цели, а најавениот марш го оценува како обид да се претстави партиски организиран настан како „надпартиски“.
„УЧК не е сопственост на ДУИ и не може да се користи како алиби за да му се измијат гревовите“, се наведува во реакцијата.
Од ВРЕДИ додаваат дека, доколку целта е протест во поддршка на поранешните лидери на УЧК, тогаш, според нив, треба да се постават прашања за улогата на ДУИ и нејзиниот претседател Али Ахмети.
Наместо повик за протест, ВРЕДИ бара јавни одговори од оние кои, како што наведуваат, биле лобисти за основањето на Специјализираните совети во Хаг.
Меѓу прашањата што ги поставува ВРЕДИ се: каков договор бил понуден во замена за поддршката за основањето на Специјалниот суд, што содржи досието на Специјализираните совети поврзано со сведочењето на Али Ахмети и дали постои поврзаност меѓу Специјализираните совети и „Отворен Балкан“.
ВРЕДИ бара одговор и зошто Ахмети различно ја опишувал својата улога во постапката пред Специјалниот суд – во еден случај како сведок, а во друг случај негирајќи дека бил сведок во постапката.
Дополнително, од ВРЕДИ прашуваат дали сведочењето на Али Ахмети послужило како основа за подигнување на обвинението против раководството на УЧК од страна на Специјализираните совети во Хаг.
„Овие и многу други прашања продолжуваат да тежат врз оние кои не оставиле ништо што не го злоупотребиле“, наведуваат од ВРЕДИ.
