Извештајот на Европската комисија за напредокот на земјава во 2025 година носи „најсериозни критики во последните години“ и покажува дека Владата доживеала неуспех во речиси сите клучни европски стандарди, изјави потпретседателот на ДУИ, Арбер Адеми, на денешната прес-конференција.
Според него, документот потврдува регресија во владеењето на правото, без напредок во независноста на судството и со видливо зголемено политичко влијание. Адеми потсети дека Европската комисија укажува и на несоодветното финансирање на правосудниот систем – далеку под европските препораки од 0,8 проценти од БДП за судството и 0,4 проценти за обвинителството.
Тој посочи дека борбата против корупцијата бележи „нулта резултати“, при што случаите со висок профил не се решаваат, а антикорупциските институции остануваат „слаби и неефикасни“. Извештајот нотира и „видливо влошување“ на слободата на медиумите, основните права и длабока политизација на јавната администрација, придружена со економска нестабилност.
„Главната порака на ЕУ е јасна – Северна Македонија не може да отвори нови поглавја без решавање на основните проблеми“, рече Адеми, најавувајќи дека ДУИ бара итни мерки за деблокирање на реформските процеси.
Меѓу препораките што ги посочи се:
– реформи во правосудството и зајакнување на финансиската автономија на судовите и обвинителствата;
– усогласување на буџетите со европските стандарди;
– деполитизација на јавната администрација;
– зајакнување на независните институции;
– целосно исполнување на препораките за првиот кластер „Темели“;
– итно усвојување на уставните измени за продолжување на интеграцискиот процес.
„Европската иднина на Македонија не смее да биде заложник на неуспесите на власта. Ние остануваме доследни на евроатлантскиот курс“, порача Адеми.
