ДУИ: МВР да го објави целосниот полициски извештај за случајот со претепаните двајца млади во Сарај

Демократската унија за интеграција (ДУИ) преку соопштение бара Министерството за внатрешни работи да го објави целосниот полициски извештај за интервенцијата од 7 октомври, при која, според партијата, двајца млади од Сарај на возраст од 21 и 23 години биле брутално претепани од полициски службеници.

— реклама —

Од ДУИ наведуваат дека во јавноста се изнесени различни верзии за настанот. Двајцата млади тврдат дека биле удирани и откако биле совладани и ставени во лисици, додека, од друга страна, беа изнесени тврдења дека тие пружале отпор кон полицијата и му го одзеле службеното оружје на еден полициски службеник.

— реклама —

Партијата бара да бидат објавени првичниот извештај на полициската патрола, записниците и соодветната документација, со заштита на личните податоци и без загрозување на истрагата.

Од ДУИ бараат да се разјасни кој го составил извештајот, што изјавиле полициските службеници кои учествувале во интервенцијата и дали нивните искази се совпаѓаат со снимките што веќе беа објавени во јавноста.

— реклама —

Од партијата оценуваат дека мора да се дадат официјални одговори на овие прашања, а доколку се утврди пречекорување на полициските овластувања, одговорноста треба да ја сносат сите инволвирани службеници.

„Граѓаните имаат право да ја знаат вистината, а полицијата има обврска да одговара за употребата на сила“, наведуваат од ДУИ, од каде што инсистираат на целосна транспарентност и одговорност за случајот.