ДУИ: Не еден, туку вкупно пет тендери за братучедот на директорот на ВЛЕН во „Бардовци“

ДУИ преку соопштение обвинува дека случајот со јавните набавки во Психијатриската болница „Бардовци“ е поширок од првично објавеното и тврди дека компанијата „Индиго Инц“ ДООЕЛ Скопје, која ја поврзува со братучедот на директорот Иса Авдулаи, добила вкупно пет тендери откако тој ја презел функцијата.

Од партијата посочуваат дека првиот договор бил склучен на 15 октомври 2024 година, три месеци откако Авдулаи бил именуван за вршител на должноста директор. Според ДУИ, договорот бил во вредност до 600 илјади денари, а на него стоел и потписот на директорот.

— реклама —

Во продолжение, како што наведуваат од ДУИ, „Индиго Инц“ добила уште четири договори, меѓу кои и овогодишната набавка за ИТ-системи и лиценци, со проценета вредност до 2,59 милиони денари, односно околу 42 илјади евра.

ДУИ тврди дека сопственик на компанијата е Бесим Авдулаи, кого го посочуваат како братучед на директорот Иса Авдулаи. Од партијата велат дека семејната поврзаност била потврдена и од самиот директор, а промената на раководната функција во компанијата непосредно пред првиот тендер, според нив, не ја менува фактичката семејна врска.

— реклама —

Од ДУИ бараат Државната комисија за спречување на корупцијата, Бирото за јавни набавки и другите надлежни институции да ги проверат сите пет постапки.

Тие бараат да се испитаат критериумите за избор, доставените понуди, учесниците во постапките и начинот на кој бил избран понудувачот.

Од ДУИ оценуваат дека не е доволно да се тврди оти постапките биле спроведени законски или дека директорот не бил член на комисијата за избор.

— реклама —

„Кога компанија семејно поврзана со раководителот на јавна институција добива пет тендери од истата институција, целосната транспарентност и проверка на постапките се обврска, а не избор“, наведуваат од партијата.

Од ДУИ дополнително го повикуваат ВЛЕН да не се повикува само на законитоста на постапките, туку таа да биде поткрепена со документација.

„Јавните пари не се семејна сопственост. „Бардовци“ не смее да се претвори во семеен бизнис на ВЛЕН“, стои во партиската реакција.

ДУИ бара целосна транспарентност, институционална проверка и утврдување одговорност, а од надлежните институции очекува да дадат одговор како компанија поврзана со братучедот на директорот успеала да добие пет тендери од институцијата со која тој раководи.