ДУИ преку соопштение отвора прашања околу имотната состојба и инвестициите на директорот на НОМАГАС, Недим Рама, откако во неговиот анкетен лист биле пријавени акции во повеќе странски компании.
Од партијата особено го издвојуваат уделот во германската компанија „Mercedes-Benz Group AG“, за кој, како што наведуваат, во пријавата стои дека бил стекнат на 22 април 2026 година, во период кога Рама веќе ја извршувал директорската функција во НОМАГАС.
ДУИ преку соопштение бара одговори за висината на вложените средства, нивното потекло, сметката од која биле префрлени, како и за тоа дали инвестициите биле пријавени во законски предвидениот рок.
„Со кои пари Недим Рама купувал акции во странски компании додека бил директор на НОМАГАС? Колку конкретно инвестирал во „Mercedes-Benz Group AG“ и кое е потеклото на капиталот?“, прашуваат од ДУИ.
Од партијата бараат Државната комисија за спречување на корупцијата да ги провери датумот и вредноста на инвестициите, потеклото на средствата и времето на нивното пријавување.
ДУИ смета дека јавноста има право на одговори за имотот и финансиските вложувања на лице кое раководи со стратешка државна компанија и повикува Недим Рама да објасни како го обезбедил капиталот за инвестициите во „Мерцедес“ и други странски компании.
