ДУИ обвини: Владата го жртвува Коридорот 8 за изборен маркетинг со Коридорот 10Д

Демократската унија за интеграција (ДУИ) обвини дека Владата го менува приоритетот во реализацијата на проектот за Коридорите 8 и 10Д, при што, како што тврдат од партијата, најголемиот дел од механизацијата, работната сила и ресурсите се пренасочуваат кон делницата Прилеп – Битола.

Од ДУИ велат дека според информациите со кои располагаат, во моментов на терен се работи во сооднос речиси четири спрема еден во корист на Коридорот 10Д, додека Коридорот 8 останува во втор план.

— реклама —

„Двата сегменти се дел од истиот проект што ние го обезбедивме со американско-турскиот конзорциум Бехтел и Енка. Денес Владата практично го менува приоритетот на проектот“, наведуваат од партијата.

Според ДУИ, причината за ваквата распределба е политичка одлука делницата на Коридорот 10Д да биде завршена пред следните избори, за да се користи како изборен проект.

— реклама —

„Ако ова се потврди, станува збор за тежок скандал: пари, работници и механизација од државен проект од милијарди евра се насочуваат според изборниот календар на владејачките партии“, стои во соопштението.

— реклама —

Од партијата додаваат дека Коридорот 8 има и пошироко стратешко значење, бидејќи е дел од источнозападното инфраструктурно поврзување и, како што наведуваат, претставува стратешки коридор на НАТО.

„Затоа сега мора да се постави прашањето: дали станува збор само за изборна злоупотреба на проект од милијарди евра или некој намерно го забавува стратешкиот коридор на НАТО? Кој има корист од слабеењето на Коридорот 8?“, прашуваат од ДУИ.

Партијата бара Владата јавно да соопшти колку работници, механизација и финансиски средства во моментов се ангажирани на Коридорот 10Д, а колку на Коридорот 8, како и кој ја донел одлуката за ваквиот сооднос и врз основа на кои критериуми.

„Овие одговори не смеат да се кријат до после изборите“, порачуваат од ДУИ.