ДУИ преку соопштение обвини дека има намалување на застапеноста на Албанците во Министерството за внатрешни работи, повикувајќи се на податоци за новопримените и наградените полициски службеници.
Според партијата, од вкупно 549 новопримени полицајци, помалку од 40 се Албанци, што претставува околу седум отсто од вкупниот број.
Од ДУИ посочуваат дека сличен дисбаланс имало и при одбележувањето на Денот на полицијата. Од 30 полициски службеници кои биле избрани и наградени како најдобри, само еден бил Албанец.
Партијата оценува дека овие податоци укажуваат на промена во кадровската политика во МВР и потсетува дека полицијата е една од институциите во кои Охридскиот рамковен договор донел значајни промени во однос на застапеноста на заедниците.
Од ДУИ велат дека правичната и соодветната застапеност е уставен принцип чија цел е државните институции да го одразуваат мултиетничкиот карактер на земјата.
„Денес, 25 години по Охридскиот договор, податоците од МВР покажуваат назадување во овој процес“, наведуваат од партијата.
ДУИ најавува дека ќе продолжи да ги следи конкурсите, унапредувањата и именувањата во МВР и другите државни институции и јавно ќе реагира, како што велат, на секое нарушување на принципот на правична и соодветна застапеност.
