Автопатот Скопје–Блаце не е проект што започнал со актуелната власт, туку неговата подготовка и постапките за реализација биле започнати уште во периодот кога ДУИ беше дел од Владата, тврди ДУИ преку соопштние, повикувајќи се на официјална документација.
Од ДУИ посочуваат дека на 27 јуни 2022 година Собранието го усвоило Законот за гаранција на обврските по заемот за финансирање на TEN-T проектот за изградба на автопатот од Скопје до границата со Косово.
Законот бил потпишан од тогашниот претседател Стево Пендаровски и претседателот на Собранието Талат Џафери. Според ДУИ, со тоа, во периодот кога партијата била дел од власта, биле преземени конкретни чекори во однос на проектирањето, обезбедувањето финансиски средства и спроведувањето на тендерските постапки.
Од партијата оценуваат дека овие документи ги побиваат тврдењата дека актуелната власт го започнала проектот од нула. Истовремено, бараат Владата да ги објави сите документи поврзани со проектирањето, финансирањето, тендерирањето и реализацијата на автопатот.
„Прашањето е едноставно: што направи актуелната власт над она што веќе беше подготвено и обезбедено?“, прашуваат од ДУИ.
Од партијата нагласуваат дека ја поддржуваат изградбата на автопатот и бараат неговата реализација да се забрза, оценувајќи дека станува збор за значаен инфраструктурен проект за поврзувањето на Северна Македонија со Косово.
Според ДУИ, за реализација на еден ваков проект се потребни подготвена документација, обезбедено финансирање и спроведени постапки, а тие, како што тврдат, биле преземени уште за време на нивното учество во Владата.
