ДУИ преку соопштение реагираше поради, како што наведува партијата, отстранувањето на албанскиот јазик од државните табли на граничниот премин Табановце, оценувајќи дека станува збор за директно прекршување на законските и уставните одредби за употребата на јазиците.
Од партијата велат дека ваквиот потег претставува провокација и доказ дека коалицијата ВРЕДИ не успева да ги заштити правата на Албанците.
ДУИ бара албанскиот јазик веднаш да биде вратен на државните табли на граничниот премин, а надлежните институции јавно да се извинат за, како што наведуваат, направеното прекршување.
Во соопштението, партијата ја обвинува коалицијата ВРЕДИ за директна одговорност, тврдејќи дека наместо да го спречи деградирањето на албанскиот јазик, се обидува да ја манипулира јавноста.
„Албанскиот јазик е службен јазик и неговата употреба е законска обврска“, порачуваат од ДУИ.
