ДУИ најави започнување постапка за собирање пратенички потписи за отворање на процесот на уставни измени. Според координаторот на пратеничката група на „Европскиот фронт“, Блерим Беџети, за поднесување предлог за измени на Уставот се потребни најмалку 30 пратенички потписи.
На денешната прес-конференција во Собранието, Беџети упати повик до сите пратеници да се приклучат на иницијативата, нагласувајќи дека станува збор за важен процес за иднината на државата.
Тој истакна дека, според него, не треба да се држат во заложништво различни заедници и граѓани поради политички несогласувања, додавајќи дека ова се „сериозни моменти и потреби“ за државата да се придвижи напред.
Беџети ги повика и пратениците од ВЛЕН да го поддржат предлогот, посочувајќи дека, како што рече, политичките партии треба да стојат зад своите програмски заложби и ветувања дадени пред граѓаните.
Тој изрази очекување дека поддршка ќе има и од пратеници на ВМРО-ДПМНЕ, а иницијативата ја оцени како чекор за отворање европска перспектива за државата и внесување на одредени заедници во Преамбулата на Уставот.
