ДУИ: Северна Македонија остана надвор од мапата на ЕУ за пристапување

ДУИ преку соопштение ја обвини Владата за застојот во евроинтеграциите, откако, според партијата, Европската комисија најавила подготовка на патокази за пристапување за Албанија, Црна Гора, Молдавија и Украина, без Македонија да биде вклучена на листата.

— реклама —

Од партијата оценуваат дека Македонија, која некогаш била меѓу водечките земји во регионот на патот кон Европската Унија, сега заостанува додека другите држави напредуваат.

— реклама —

ДУИ тврди дека состојбата е последица на политиките на актуелната Влада, за која наведува дека во изминатите две години не понудила решение, не отворила поглавја и не направила напредок во пристапниот процес. Според партијата, наместо конкретни чекори, јавноста била сведок на оправдувања, конфликти и меѓусебни обвинувања.

Од ДУИ предупредуваат дека другите земји ќе добијат конкретни планови и рокови, како и подобар пристап до европските фондови и пазарот на ЕУ, додека Македонија ризикува дополнително да се оддалечи од државите што напредуваат кон членство.

— реклама —

Партијата побара од Владата да одговори зошто Македонија не е вклучена во најавените планови, каква е стратегијата за продолжување на евроинтеграциите и какви последици ќе има застојот за државата.

„Одговорноста е на Владата. Ја презедоа државата со отворен пристапен процес, а ја оставаат без пат, без рок и надвор од мапата на проширувањето“, наведуваат од ДУИ, додавајќи дека Македонија е задржана во место додека другите земји од регионот напредуваат кон ЕУ.