Демократската унија за интеграција (ДУИ) упати остри обвинувања кон вицепремиерот и лидер на Демократското движење, Изет Меџити, прашувајќи „кој го држи во заложништво“ и што, според нив, го тера да молчи за прашањата поврзани со албанскиот јазик, знамето и застапеноста на Албанците.
Од ДУИ оценуваат дека Меџити ги предал своите поранешни соработници, а сега, како што наведуваат, го предава и националниот интерес на Албанците.
„Што го тера Изет Меџити да каже: доста веќе со знамето, доста со јазикот, доста со застапеноста? Што толку силно го држи Изет Меџити?“, прашуваат од партијата.
Во соопштението се наведува дека Албанците имаат право да прашаат дали, како што тврдат од ДУИ, „бројните досиеја за кои со години се зборува дека стојат во фиоките на обвинителството“ се причината за неговото однесување или, како што додаваат, станува збор за нешто друго.
„Што е тоа што го тера молчешкум да го прифаќа секој удар врз албанскиот јазик, знамето, застапеноста и положбата на Албанците, а потоа да им порачува и на Албанците дека треба да молчат?“, се наведува во реакцијата.
ДУИ оценува дека евентуалната „заробеност“ на еден политичар е негов личен проблем, но дека, според нив, ситуацијата станува многу посериозна кога поради тоа, како што тврдат, „во заложништво се држат политичкото претставување и судбината на цел еден народ“.
„Судбината на Албанците не може да биде заложник на стравот, досиејата или личните интереси на Изет Меџити“, порачуваат од ДУИ.
