ДУИ: Уште еден странски инвеститор си заминува - Владата да одговори колку работни места се загрозени

Демократската унија за интеграција (ДУИ) преку соопштение обвини дека уште една странска компанија ја затвора својата инвестиција и ја напушта Македонија, оценувајќи дека тоа претставува сериозен удар за економијата и за вработените.

— реклама —

Од партијата наведуваат дека во изминатите две години три американски и германски инвеститори одлучиле да го прекинат или да го преселат своето производство, што, според нив, не може да се смета за изолиран случај.

— реклама —

Според ДУИ, странските инвеститори се соочуваат со економска неизвесност, недостиг на јасна европска перспектива, нарушени односи со соседите и зголемени меѓуетнички тензии, што, како што тврдат, влијае врз нивните одлуки.

— реклама —

Од партијата оценуваат дека последиците директно ги чувствуваат граѓаните преку губење на работни места, намалена економска активност и засилено иселување на младите и квалификуваните работници.

ДУИ ја повика Владата да соопшти колку работници ќе останат без работа, дали има најави за повлекување и на други компании и кои конкретни мерки ги презема за задржување на постојните странски инвеститори. Според партијата, Владата треба да преземе одговорност за, како што наведуваат, економската несигурност во земјата.